NLUP sum leh Congress ministry

Congress Ministry chungchanga tunlai sawi hlawh berte zing ami chu an flagship programme NLUP hi ani. Hun engemaw chen chu peih mai tura sawi anih mek laiin hmanni khan kan Home Minister in NLUP sum chu sorkar sum indaihlohna/remchanzawkna? avanga Department 22 ah (Rs.95.52 crore) sem darh anih thu a sawi kha kan hre theuh awme, Hun chep tak kara hetianga sem darh ani ta thut hian zawhna tamtak a chawk chhuak tih chu chanchinbu lamah te kan hmu ta fo reng ani. Hemi rual hian “miretheite hmangaihtu” sorkar nia insawite tawngkam leh chetkual dan rilru ah alang nghal bawk. Tunlai kan CM hmui leh mi rethei (a VIP te) tih hi a inhmeh em em lai hian keini mipui, mirethei te hian mipui sorkar a miretheite chawikan annih hun tur chu kan thlir.. ngeni he beiseina hi a khural mai zawk dawn? Controversy tam tak karah tunhnaiah AH & Vety Dept. atanga bul tranin hmalak mek ani ta a. Hei erawh thil lawmawm leh ruahmanna fel tak nena kalpui turah ngai phawt ila.

Tunlai Mizo mipuite zingah mi fing taktak, bum nih duhlo tamtak an awm tawh. Hetiang anih mek lai hian kan ram duh tak min hruaitute “nuam tawl sorkar” tih hiala sawi an lo nita hi an inenfiah a pawimawh takzet ani. Financial year a'n zova, sum hman hmnnloh kan ngah zia kan CM ngei pawhin a sawi laiin mi retheite sum erawh indaihlohna avanga sem ral ani leh lawisi hi keini miretheite hian a na kanti..! Chutiang anih deuh nuaih laiin WORLD RECORD siam nana sorkar sum, Rs.40lakhs sen ral te, CM HELICOPTER chuan nana sum Rs. 5,63,500 hmanral te kha kan rilru ah vawng tel bawk ila..! Hei hian tuna kan Sorkar Pro-poor/pro-people programme a tilang chiang hle, Central sorkar aam admi policy nen a inhmeh em tih tepawh ngaihtuah tel ta ila tha in ka hria. Thil dang deuhah, eiru thubuai chinfel lawmna tih te, Home Minister in lelte award dawngtute dinner eipui tih vel te, a nuam khawp ang!. Politicians threuh threuh Rahul Gandhi an thingtlanga dalit ho inah dal-roti a kilpui tih nen chuan a ri a inang lo hle tih te min ngaihtuah tir. Kan ram retheih leh intodelh loh viau laia heng extravaganza a sum an luang ral mai mai te hi zahthlak tak ani. Khing aia ramin kan mamawh hmasak kan tlakchham em em si, a langsar zual ah power, tui, gas etc a harsatna sutkian lam te hi a democratic fe zawk lo maw? Tuna kan sawrkar sum lapse (cheng vaibelchhe 70.52 vel anga report) chungchangah pawh sawi a tam. Lal ruai kil phak leh corruption ni chiah silova a thau sawk thei chin bill cheng nuaih 71 tihvel, Pii nau bill nuaih engemawzah telve tih thawm te hi a dik angem aw..?! a dik anih chuan tuna kan CM hian miretheite aia a mimal VIP te tan hian a hmaa an hloh zawng zawng bakah a let vel an hlep theihna turin supply tihvelah duhsakna uchuak a lantir lo ring lawk phawt ila thilmak ani hran dawn emni.. a kuma kum hetianga an induhsak anih chuan hausa sa tan pawh hausak belh zel a awl khawpang le...(corruption zawnga han tih theih leh dan ang taka thil diklo anih pheizawng ka hre lemlova) Engpawh nise, chutiang vang ni lem lova a ‘mualphothlak’ em avang zawk a CM thinrim ang chhuak in, a mawhphurtute zawn chhuah a hrem annih ngei tur thu a sawi hial a. Debate a ti tamin mithiamten an sawifiaha, sum Lapse hi retrieve theih ani tih an sawi hnuah chuan mawhphurna a lak thu a sawi leh si te kha a ngaihsanawm dan a dangdai ve reng rengin ka hria!. Opposition party lamin an dem a MNF President ngei pawhin sum luangral hi hmuh let theih a rinloh thu a chham laiin thenkhat ve thung chuan lapse lo ta se Treasury khar hial a ngai thei ang an lo ti ve bawk a. Accountant General Vishal Bansal in Mizoram Plan Budget lapse hi State Consolidated Fund ah lutin, thuneihna chu Executive atanga Legislative ah a insawn thu a sawi ta bawk kha ania (heihi a nih dan tur ve reng nge central lama link ten an hmingchhiat thupnan an rawn her danglam phei zawng ka hrelova..).. Hmu let emaw let lo emaw,he thil thleng hian Congress ministry administration felloh zia leh kalphung her danglam a ngai hle tih a tilang chiang khawp. Treasury in heti zat bill a pass hmanlo hrim hrim hian a Department enkawltu CM inthladah zia a pho lang hle bawk. Sorkar hnathawkte thatchhiatna au puia 50% pawh bang se buaina a awm ringlo tu tan chuan he thil thleng hi mahini in en leta zah ngawih ngawih na tham ah ka ngai. Tin, CM in Sorkar hnathawkte sawi thraih leh vau chiam ang chi hi a fuh berlo. Seat of Power, dinhmun pawimawh leh zahawm taka thru(kan aiawh tura kan thlan mai mai ni lawi si..) hian mipui zahna hi an hlawh chhuak tur ani. Programme leh Policy, hmalakna tur ang chite mipui hip nana an tiam anih chuan hlen ngei a trul. Hlawhtlinpui leh zui si loh thin hian mipuite zah lohna leh bumna a entir thin. NLUP sem chungchanga thutlukna nei leh lawk theilo, ‘hnam ngeng chhun’ tia Rev.Chanchinmawia thihdan thlaruk chhunga chhui tih te… an thu tiam zawng zawng tekha tih hlawhtlin an neih ka hrelove.., an thutiam hi engtikah nge a taka chantir anih dawn? Zoram mipuite dawhtheihna hi a nghina, an awmthat duh loh hun a thlen mai chuan an hlauhawm khawp ang. Rev. Chanchinmawia thih chungchangah khan ka rilru ala dam theilova, khatiang taka mi diklo tena mipui pawh zahlova thil anti thei tekhan ka rilru ala tina ani. Khami avang leh politician te awmdan avanga mipui lungawilo leh thinrim hi an hlaulo anih chuan puah keh hun ala nei anga a sawhkhawk chu nasa tak ala ni ang. Hetianga mizoram, midiklo te thiltihtheihna hmuna siamtu kan hruaitute hian mipuite zahlo takin trawng chhuak trawng chhuak lo sela anmahni hi in en let zawk rawhse. Tawngkam ringawta mi retheite hmangaih inti hruaitu hi kan mamawh lo. Ram hruaitute tawngkam thlahdah chungchangah pawh sawiselna leh fuihna chhuak a tam. Corruption a zung nen lama pho ro a tum thu kan hre lar. Mi titi a tuna a minister chhuanvawr pawh hi a MLA lai khan zinloh bill la zinga tel nia an sawi te hi…?RTI a hai lan anih hnu ah pawh la pe let duhlo anih chuan eiru nilovin eilang ani tihna animai lawmni? Eilang pawh a thawhpui duh chuan engtinnge eiru chu a phoro tak ang le? An sawrkar hmasak lai atanga an awmdan tepawh mipuiin kanla theihnghilh bik hleinem.. Officer lian taktak, eiru nasa leh Sorkar zahna leh hlauhna nei map lo, transfer takngial pawh tih hleihtheih loh khawpa inluling a an sawi tehi.., ‘pho ro’ an nihloh chuan vulh len zui zelin an awm dawn ta em ni? Hnalak chungchangah te pawh, District pakhata Dept Officer chuan hnadil leh pek lamah chuan official thu zawkte duhsak zawng ten an luah zel avangin thu an neih ve loh thu a sawia. He kalphung, thuneitute’n a an duhsak zawngte an thiamna in phak lo chunga hna pawimawh taktak an pek thin hi kan ram thanmawhbawkte zing ami, mi tam tak rilru natna, corruption chikhat ani, pho ro a sim hmak a hun tawh. Ram hmasawnna tur atana mipuite mawhphurna leh insiamthat trul zia chu sawi loh a lum ani. A materialize na tur erawh chuan ram hruaitute hian mawh an phur tlat si ani. Chuvangin kan elected representatives te hian an dinhmun hi misuse lova tih takzeta an beih ava hun ta em. Moral Reformation pawh hi ram roreltute atanga tran anih ngat chuan an kaihhruai mipui te hian kan zawm em emin a rinawm. Tun atanga kum 30 velah chuan thangthar te hian tuna Zoram min hruai dan chungchang hi anla lepse dawn chauh, tuna pu hawla thuneih leh neihloh hi an rawn care dawnlo.. Ram leh hnam hmangaih inti tu te tan chuan thahnemngaia thawh mawlh mawlh ava hun em!. Eng ang legacy nge he sorkar hian an hnutchhiah dawn tih chu an kuta awm ani. He sorkar history, kan ram history la ni tur hi, chhuang takin kan la sawi dawn nge thinrim leh zak takin kan la reflect dawn?.